ZRA Pawl Caah Cun Thawngpang Chia Taktak A Chuak Ne Ai

Tedim le Tonzang peng chungah Zomi ralthuam tlai mi ZRA le PDF karlak ah boruak a sosang deuhdeuh i, tu ahcun PDF komkhawm nih Zomi Ralthuam tlai mi ZRA cu PDF cungah hnahnawh nak an tuah rih a siah cun lungrual tak in a doh nak ding kong le ZRA an ci an hmih hna nak ding kong ah ralrin nak cu fakngai in an pek hna.

September 23 ah Tedim PDF nih ZRA cu ralrinnak an rak pek hmasa cang hna i tu ahcun Kalay PDF zong nih ZRA cu PDF cung ah i dawhcah lo ngai i an cawlcangh rih a siah cun,PDF komkhawm lungrual in ZRA an doh nak ding kong cu ralrin nak an rak pek ve hna. ZRA nih PDA Keizang, PDF Zoland le Hualngo PDF pawl i an sakhan 3 cu an rak hrawhpiak cang hna.

Tu ah PDF Zoland cu PDF Kalay he tuanti dingin lungtlin nak an tuah dih cang i PDF Kalay nih ZRA cu PDF cungah i dawhcah lo tuk in cawlcang ti lo dingah le an cawlcangh than a si le PDF komkhawm in an ci an hmih nak hna ding kong cu an theihter hna.

PDF Kalay nih “PDF Zoland he dothlengnak ai thok ka ah tuanti dingin lungtlin nak an rak nei cang. Mah cucu ralkap uknak dih dingin, Federal Democracy uknak ngah dingin, nawlneih nak cu mipi pe than dingin timi pin ah mipi lungtlin nak ah tel loin nawlneih nak ai molh pi mi bantuk i a cawlcang mi zong an ci kan hmih dih hna lai.

“Tonzang le Tedim peng chungah PDF cungah hnahnawh nak a pe lengmang tu ralthuam tlai an um i,amah cu Myanmar ralkap he rian an tuanti hna. Cupawl hna cu mipi duhdan dokalh in PDF cungah hnahnok in an cawlcangh than a siah cun, PDF komhkhawm in kan doh hna lai i an ci kan hmih lawlaw hna lai tiah ralrinnak kan pek hna. Tonzang , Tedim le Kalay Kabaw chungin ralkap leitang mi pawl cu cazin kan lak dih cang i a herh ning bantuk in, hremnak kan pek hna lai,” tiah ca an chuah.

ZRA nih an siannak tel loin Tedim le Tonzang peng chungah a ho hmanh ralthuam tlai pawlkomh dirh thar le umhmun khuar an sian lo nak kong ca an rak chuah lengmang cang i Tonzang le Tedim peng chungah umhmun khuar i ralthuam tlai pawlkomh thar dir mi pohpoh cu kan hrawh dih hna lai tiah ZRA nih cun nawl an chuah lengmang ve.

Leave a Reply

Your email address will not be published. Required fields are marked *