Vawleicung Footballer Minthang Maradona Ruak Phul Dingin A Fapa Nih Nawlnak A Tuah

Vawleicung footballer vialte lak ah minthang bik tiah chimmi Maradona thihnak kongah chim le ceih mi a tamtuk ruangah a fapa tiah chimmi Santiago Lara nih a pa Maradona ruak cu phulthan i, a fapa taktak asi le silo cheknak tuah dingin nawlnak a tuah tiah theih asi.

Vawleicung ah football thiambik tiah ruahmi Maradona nihhin vawleicung i a nunchungah fa tampi a neih hna. A fa tiah fiangte in theih mi panga an um. Mah hna cu Diego Junior (34), Jana (23), Dalma (32), Gianinna (30) le Diego Fernando (7) hna hi an si. A fa tiah a fiang mi hna hi nu dang pali hna nih an neih mi hna an si. A fale i annu le lak ahhin Claudia Villafane le  Veronica Ojeda hna zong an it el. Mah lio ahcun a fa tiah chim mi hna hlei ah Maradona fa tiah an chimmi minung panga dang an um fawn rih. Mah hna cu Cuban pathum-Joana, Lu le Javielito hna hlei ah magali Gil (23) le Santiago Lara (19) hna hi an si. Kum 19 Lara hi Maradona ruak phul i, DNA test neih a duhtu bik cu asi.

Santiago Lara nih Telemundo’s Suelta la Sopa programme a chimh ning ahcun kum thum hrawng te lawng asi lio ah a nu nih cancer in a thihtak cang i, a thih tak lai te ah hin a biapi taktak mi bia a chimh i, Maradona fapa asinak kong hi a nu nihcun a ka chimh tiah a ti. A nu biachim nih hin a thinlung a suk tuk i, vawleicung mi tampi nih an uar tuk mi Maradona fapa si cu ai uantuk tawnnak kong le mah lio i a pa a van thih ruangmang ko cu faak a tiin a tuartuk nakkong a chim.

Kum 19 upa Lara nih a lawyer Jose Nunez sinah a pa ruak phul i, a fapa dik tak asi le silo theihkhawhnak dingah Court ah chuah pi i, nikhat chung hrimhrim ah sullam neite in le tlamtling dingin a chimh. Lara nawlnak bantuk hin Argentina khuapi pawng te ah a ummi La Plaza khuapi i family Court ah Maradona ruak phul halnak hi tuah asi. Lara nihcun kum tamtuk chung a hringtu pa theih tim in a rak i zuam cangnak kong a chim i, apa tiah chimmi Maradona ruak hi phul asi lo ahcun hi kong hi zeitik hmanh ah a fiang kho ti ding asi lo tiah a chim chih fawn.

Maradona ruak phul ding in a nawltu Santiago Lara nu le Maradona hi kum sarih chung an rak i zul cang tiin bialeng vak zong a van um chin lengmang ve fawn.

 

Leave a Reply

Your email address will not be published. Required fields are marked *