Thihsii Hmangin Sianghngakchia 25 A Thattu Cu Thah Ve Dingin A Kong An Ceih Piak

China Henan Province ah sianghngakchia minung 25 thihsi a petu Kindergarten saya cu September ni 28 ah khan thi dingin a kong ceih piak a si. China Daily nih a tarlangh ningah cun Meng Meng Kindergarten teacher Wang Yun nih sianghngakchia porridge eiding ah Sodium nitrite a cawh piak hna i, minung 25 an thi tiah an chim.

Wang Yun nihhin hi thil ttha lo taktak a tuahnak a ruang cu a riantuan hawi saya dang hna he an buai ruangah phuba laknak ah a tuah mi asi tiah an chim. Sianghngakchia zohkhenhnak kongah saya te dang hna he buai in an i sik ruangah aa sik pi saya te dang hna nih an zohkhenh mi sianghngakchia hna cu a tu bantuk in thihsi a pek hna hi asi tiah an chim.

Wang nihhin hngakhcia hna thahnak caah a hman mi nitrite cu online in March 27,2019 ah khan a rak cawk cang mi asi tiah theih asi fawn. Hngakchia hna nihhin an rawl ah thihsi ai cawh mi an ei hnu hin tthalo tein an luak i, an theihnak hna hna cu a lo i, lungfim lo in an um beh i, an lak ah hngakchia 1 cu siizung ah an thlopbul hnu ah a thi ve than tiah BBC nih a tarlangh.

China cozah nih thi dingin an cungah biachahnak an tuah mi hna an thah hna ningin hi nu zong hi injection hmangin asi loah ralkap nih thilak in kah asi lai tiah an zumh.

 

Leave a Reply

Your email address will not be published. Required fields are marked *