Spain Ram I A Kal Mi Myanmar Media Pa Ca Ah Cun Vawlei Pi Hi A Ca Ah A Him Bak Ti Loh Mu

Kum 30 mi Ko Mratt Kyaw Thu cu media minthang tuk mi pakhat a si. Yangon ah aum i ralkap cozah dohdal in an sualnak pawl vialte cu a langh ter zungzal. AFP nih 2017 kum ah Media hlawhtling tiin laksawng an rak pek cang mi a si.

Myanmar ramchung buainak pawl vialte cu a rak pholangh lengmang ruang ah ralkap nih tleih ding in an kawl lengmang. Caan saupi chung cu a hawi le sin ah ai thup. ralkap nih an tleih mi pawl hna cu fak taktak in an hrem hna. Minung an tleih mi hna an thah lengmang hna ruang ah cun a taksa him nak ding caah tiin ai thup.

Ko Mratt Kyaw Thu nih “Innleng i keden thawngpang ka theih poh ah khin an rak ka tleih cang rua lai tiah ka ruah tawn. Biatak te i ruah a sur can zong ah khin cu thawngpang cu meithal puah thawng ah ka rel tawn i ka lau tuk tawn e a ti.

Zankhat cu a hawi le nih “Na umnak an in theih, Yangon na chuah tak bak a hau ko tiin ca an kuat i Thailand ramri ah cun a zam colh. Ramri ah NGO le tlang cung hriamtlai pawl nih an rak bawmh. Asinain, Thailand ram zong ah a him hlei loh ti a theih.

Thailand cozah pawl nih cun a um an theih a si ah cun, Myanmar ramah an kuat than ding ruang ah Europe lei i zam khawh nak ding kong cu a buaipi than i Visa a try hnuah a ngah. Cuti cun, Spain khuapi Madrid ava phan kho i an ram chung ah humhim nak a hal hna.

Ko Mratt Kyaw Thu nih “Thailand ram ka chuah tak i, vanlong chung lawngah tlawmpal te ka him i ka hnangam deuh tiah a ti. A umnak Spain ramah Myanamr ralkap pawl i an sualzia le mipi pawl an thah ning kong vialte cu a chim lengmang.

Ko Mratt Kyaw Thu nih “Kumkhat, kumhnih chung kan doh hnuah teinak kan co lai. Ka hawi le sibawi le cawng sayama pawl cu CDM ah lut in ralkap pawl an doh cuahmah hna. Culio ah kei cu hi ka hmun i ka rak um mi hi cu ka thinlung nuam lo tuk e a ti. Asinain, khat lei ahcun media pawl an tleih dih hna a si ah cun a ho dah ca a tial lai i a ho dah thawng a thanh lai a ti.