Nu Tlaihhrem Hmangmi Poh Cu Tildih Piak An Si Cang Lai

Pakistan Prime Minister Imran Khan nih nupa sualnak he pehtlai in sualnak a zawr chin lengmang khawhnak dingah tiin nu tlaihhrem hmangmi hna cu an til dih piak nak ding dan a pawm tiah theih asi.

Federal cabinet meeting anneihnak ah law ministry nih anti-rape ordinance a sermi hi an pawmpi tiin Geo TV nih a tarlangh. Asi nain official in phuannak belte a um rih loh.

Policing lei ah nu tamdeuh luhter le nawlngeihnak sang deuh pek le tlaihhrem case pohpoh cu rianrang taktak in hlathlai le zulhdawi colh dingin ti asi fawn.

Prime Minister Imran Khan nihcun hi thil hi a rannak in hman asi lai, ram le mipi himnaknak cu a biapi bik mi thil asi tiah a chim fawn. Dan an serthar mi cu khauh taktak in hman asi lai ti zongah a chim chih fawn.

Federal minister cheukhat nihcun tlaihhrem tu hna hi hri in thlai colh si hna seh tiah an duh deuh. Asi nain Imran Khan nihcun tildih piak in hram thok hmasa an si lai i, nu a tlaihhrem tu hna cungah federal cabinet nih khauh taktak in dan an kalpi lai tiah a chim fawn.

Ruling Pakistan Tehreek-i-Insaf senator Faisal Javed Khan nihcun Parliament ah ordinance an serthar mi cu a rauh hlan ah mipi theih ah phuan asi lai tiah a chim fawn.

Pakistan ah hin January 2018 ah khan kum sarih te lawng asi rih mi hngakchia tlaih hrem a rak si. Mah pin ah naite ah khan motor tlik lio ah Lahore ah tlaihhremnak a chuah than ruangah dan khauh deuh in ser duhnak hi a van thang chin lengmang tiah an chim.

Leave a Reply

Your email address will not be published. Required fields are marked *