Nga hling / Nga ruh Na Hrom A Tan Tik ah Chikhat te ah Mithnawm Lak Bantuk in Lakchuah Khawh Than Colhnak Lam Thabik

Ngasa kan eitik ah ngaruh/Nga hling hi kan dang ah a tang tawn i a can ah cun mah tein i chuah than can zong a um nain mi thenkhat a vanchia mi cu mah tein i chuah khawh tilo in sizung tiang a va phan mi an tampi ve tawn. Cuca ah cun ngasa a eitawn mi caah cun ngahling kan hrom i a tan tik ah sizung kal haulo tein mah tein i chuahkhawh ningdan theihcia cu a rak herh ngaingai mi a si ve.

Cucaah a tanglei ah kan rak langhter mi chung ah mah dirhmun ning zulh le mah ngandam nak ning zulhin pakhat khat rak tuah khawh a si. Na hrom ah ngahling a tan tik ah Tanphaza kha a hawng na kheh hnu ah hakarcawihnak fing tia tete in na sawh cia lai i cu hnu ah na kaa chung ah na hmawm lai i a hang cu na dolh ko lai. Tanphaza hang nih cun ngahling cu a nemter colh lai i fawi tein na hrom a doh mi cu a damh colh lai.

Tanphaza lawng silo in banhla zong a tha tu ve thiam ko. Zei bantuk banhla a sihmanh ah ei law na hrom i a tangmi ngahling cu a tlau thaa lo tuk fawn lai. Culawng silo in Arti a chung a met tello zongin eipiak law na hrom i atangmi ngahling he na pawchung ah an tla ti lai i na pawchung a phak cang hnu ah thinphang ding a um ti lo na pawpi i a rak um mi seh nih cip dih in an rial piak colh khawh ve cang ko.

Cun , khuhlu zong a tha tuk ve i khuhlu kha na khai lai i a fe he a hang he na dolh dih lai ti na din piak chih lai i ngahling cu na hrom ah a um kho lo hrim lai. Culawng silo in ung-si (tanlwinsii) kha tlawmpal tein na dolh lai i na hrom i ngahling cu a tla ko lai . Cun na hrom a fak mi zong a dam colh fawn lai.

Cun buh zong kha na kut in hlum ta law dolh law ngahling cu na dolh chih colh khawh fawn lai. Ralrin ding mi cu na hrom i ngahling a tan tik ah na kut in na kaa kha pur chih hlah na hrom zong kha tawng chih fawn hlah na hrom caah tihnung a si ve . Cu nak cun a tu kan chim mi pawl chungin na duhmi pakhat kha rak tuah law fawi tein ngahling cu na pawchung lei ah a tla ko lai.

Kan chim mi chung ah pakhat hmanh inn ah nai chiahcia mi a um lo a si zong ah na rawlei mi buh kha na kut in hlum law dolh law a fawibik fawn . Ngahling na hrom a tan tik ah na thinphang hrimhrim hlah fawi tein a chuahdan le pawchung lei ah a tlakter dan a tampi tikha rak thei cang.

Leave a Reply

Your email address will not be published. Required fields are marked *