Mah Tluk Muidawh A Si Mi Nih Ram Mipi Na Tanh Hna Ruang Ah Hithil Na Ton Ko Mi Hi Cu E, A Fak Khun Ko Mu

Miss Grand International 2020 muidawh i zuam nak ah Myanmar rampi aiawh in ai tel mi nungak Han Lay cu Thailand khuapi Bangkok airport ah Thailand palik pawl nih an tleih tiah thawng Kan theih. Han Lay hi Miss Universe Mandalay 2015 le Miss Universe Myanmar 2015/2016 kum i muidawh i zuam nak ah 1st runner laksawng a ngah mi a si.

March 7, 2021 ah khan Thailand i an tuah mi Miss Grand International 2020 muidawh i zuam nak ah Myanmar rampi aiawh in ai tel. Cuka hmun ah cun ralhrang pawl i an sualzia, ṭhatlonak pawl cu vawlei cung khuaza ram kip hmuh khawh ding in a langh ter.

Curuangah cun ralhrang pawl nih tleih dingin pohmah 124/1 in buainak an orhter i tleih an timh. Myanmar ram ah a tlung ti loh. Ralhrang pawl nih a passport an thihter. A Visa kongkau ruangah Vietnam ram ah ava kal, Cuti cun September 21 zanlei sang ah Thailand ram ah cun a va kir than i Bangbok airport ah an rak kai.

Hi a konglam a thei tu minung pakhat nih cun “Airport ah an rak kai, Interpol cazin i ai tel ruangah an ti. An tleih nak a ruang bik hi fiangfai te cun ka thei kho ve rih loh” a ti. A zan cu Airport chungah a riak. Thailand ram in Vietnam ram ah an kuat than an timh, Vietnam ram a phanh hnuah cun Myanmar ram ah kuat dingin an tawlrel. Myanmar ram i an kuat ah cun a caah a poi tuk ding ruang ah tuanvo a neitu pawl nih cun kuat lo dingin an buaipi cuahmah Lio a si.