Breaking News || Delhi Le Malay Sia Panh Lo Ding Ti Si Ko Hi Teh
US rammi sinak nei in ziangkim a tum thei asile raltlan a ko thei ding timi thuhla thawn pehparaw in hautak zet a si ruangah Chinmi pawl Malaysia le Delhi pan ciamco lo dingin US ih um pawl cun dilnak an nei. US ih chinmi hruaitu pakhat cun “Thuhla kan zingzoi tikah thudik cu a siko. Asinan, tui kum sung ahhin raltlan 5000 hrawng lawng kawh theih a si tikah beisei ciamco ding a um lo. Cumi hman kanmah Myanmar raltlan lawng a silo, leitlun hmundang ih raltlan khal an tel thluh. Ahleice in Ukraine pawl hi ting 1 lenglo an ko aw thei thung. Tu ah hram an thok ding fang a si ih, an hlawhtling a si ahcun hamthatnak cu a um vivo thei ding.
“Asinan, kan theih dingmi cu a kotu in a bank ah tangka bikhiah an tuahzat a um a tul dingih, a kawhmi a thlen tikah a tulmi ziangkim a timtuah sak thluh ding. Cumi ding hmanin US rammi sinak neih a tul ih, US thleng raltlan pohpoh in mi an ko thei lo. An kawh dingmi khalin UN card an neih tengteng a tul ih, UN card tel loin kawhawk a theih lo. UN card neih hnu hmanah duhdawttu taktak sungkhat le rualpi țha kotu ding neih a tul. Tu ih UN card nei cia hrang ahcun mah ko theitu ding ngaihven theih a si ih, UN card beisei ding cop le dil cop ding hrang ahcun Delhi le Malaysia pan ciamco hlah uh,” tin sawmnak a nei.
Delhi ih Chinmi hruaitu pakhat cun “Kannih Delhi ahhin UN card nei cia kan hnihthum zetih Australia le Canada kawhawknak khal kan tuah rero zo. Tu ih US kawhawknak an timi cu Australia thawn a danglam aw verver ih, Canada kawhawknak thawn thuhmun deuh cu an si. Delhi ah kawhawknak in Ausutralia le Canada feh ding khal tampi kan um nan, 2020 ihsin zohman Delhi ihsin ram thumnak feh kan um nawn lo. Ziangahtile, India cozah in India ram suahsan theinak Exit permit a pe duh lo ih, Zohman ramdang kan feh thei nawn lo.
“Ziangaruangah India in Exit permit a pe duh lo timi a san khal thuhla phunphun a um nan, zohman in a san diktak an rel thei lo ih, anmah India cozah khalin a san diktak an sim duh lo. An zumhmang thuhla 3 lai cu a um nan, Exit permit an pek lo san diktak theih a silo ih, an phuang duh lo. Kan ram buainak ruangih Delhi thleng pawl khal Temporary card lawng pek an si ih, UN card taktak pekmi pakhat hman an um hrih lo.
“Temporary card in ramdang a feh theih lo ih, UN card taktak ngah dingin Interview an tuah bet a tul lai. Interview a um tikah Temporary card nei zaten an tling thluh ding tinak a si cuang lo, an thurel dan ih zir in UN Card taktak an ngah thei ih,ngah lo lanta thei khal an si. Ziangtikah UN card tatkak hrang Interview an tuah ding timi khal felfai zetin a caan theih a si hrih lo,” tin a sim.