A Tu Lio Min Aung Hlaing Dirhmun Le A Thil Tuah Mi
Min Aung Hlaing(MAH) nih Feb 2, 2021 ah ramuknak hramhram in a laak mi cu 2008 upadi ning in caan karlak uknak (Emergency Power) kha kum 1 tlaih chung i cu chung ah thimnak (Election) tuah țhan ding kha asi. Cu kum 1 caan chung ah thimnak atuah khawh lo ahcun thla 6 in voi 2 tiang Emergency Power in uknak caan kha asauh khawh ti asi. Adihlak ah kum 2 uknak a tlaih khawh tinak asi. Cucaah atu hi thla 6 in voi hnih zong cu a caan asauh cang i Emergency Power hmannak nawl 2008 upadi ning in a hman mi cu January 31, 2023 ah adih cikcek cang.
2008 phunghrampi ning hrimhrim in nikhat zong Emergency Power hman țhannak nawl le sauh chap khawhnak nawl angei ti lo. Cucaah tu thla dih cun 2008 Upadi ning bantuk in uknak arak laak lio i President kut ah khan ram uknak kha ap țhan ding asi cang. Asinain a ap lai zumh asi lo. MAH nih hin “Emergency Power” in uknak atlaih chung ah ralkap nih ram an uknak an min cu, SAC – State Administration Council tiah a bunh. Caan karlak uknak tlaitu cozah kan si ti in vuanci (Cabinet Minsters) zong rian a khinh len hna.
Mah pawl vialte hi 2008 Phunghrampi ning incun January 31, 2023 ah an dih viar ve. Cucaah Min Aung Hlaing nih hin hmai zarh incun SAC khi phundang in a kalpi ahau cang. Amin hmanh athlen ahau te hnga. Zapi nih zumh deuh cio mi cu USDP pawl ahman hna lai i Union, State, District, Township tiang anmah nih uknak an tlaih te lai. Cun election hi an nam chih lai tiah zumh a si. Than Shwe te chan i SLORC in SPDC ah an i thlen phun kha asi te hnga.
Min Aung Hlaing(MAH) nih Election hi atuah khawh lo ding ai theih a si ahcun zapi ruahnak – Referendum – cu ni cu thla ah ka laak lai i mipi nan nawl si seh ti in a kan hlen țhan te lai. Afiang mi cu uknak hi atlaih khawh nak ding lam aum mi poh in tlaih ai timh peng lai caah Election asi zong , Referendum asi zong ah mipi nih duh hrimhrim loin second pakhat zong ngol loin doh kha abiapi bik kan rian cio cu asi. Ralkap nih cun anmah uktu an si khawh nak ding asi paoh ahcun Federal State, Autonomous Region ti bantuk zong an kan pek ngam dih ko lai.
Asinain cucu anmah bawi ter peng, alu ah chiah peng hna lawng ah pek ding phun khi kan si lai caah an kan pek ning lawng ai dang lai nain an chung muru cu 2008 phunghrampi kha an si peng ko lai ti thei zungzal ko hna usih. Nan thinlung țhawng ko uh. Dothlennak ah hriamnam țhabik cu thinlung a si. Sunday zan ah tling deuh in atulio Kawlram Politics zei dirhmun kan phaak timi le Next kan kal rih dingmi ka rak chim te lai. Ka lawm. Credit Victor Khen Sang