A nupi Lu a tan i Khuachung ah ai Chawh pi – Ai Chawh pi lawng hmanh siloin Hla ai sak pah rih – A thah ning konglam

Minung ngai hi kan sining lawng siloin kan lungthin put ziaza pawl hi a rak i dang tuk lawmmam hna. Sual hi cu a um i mithah lainawn a hmang mi zong tampi kan theih tawn ko hna nain a tu i kan thieh mi kherkher hi cu kan voikhat theih nak lawng a si men lai ti zumhnak a um.

A molh i maw a si hnga thei hlah? A molh zong khi va siseh law, midang amolh mi vialte nih hibantuk thil an tuah bal lo nain zeiruang ah dah a nih kher nih hin a tuah hnga? Molh thalo in maw amolh hnga? A molh mi a si tiin ca lak nak nih a chim fawn loh i a molh loh ti cu a fiang fawn.

India ram Uttar Pradesh state i khua a sa mi Akhilesh Rawat (Kum30) pa nih a duh bak ca i nupi caah ai thim mi le a thit mi a nupi cu a thah. A thah lawng hmanh siloin a nupi hngawng cu a tan, A hngawng tan lawng hmanh si rih loin a tan mi a lu cu khuachung ah ai chawh pi. A nupi lu ai chawh pi pah cun tha nuam ngai khin Hla ai sak pah rih.

Cu ti i a nupi lu ai put bu i khuachung ah chawh lio cu mipi a hmu tu nih an ttih tuk hringhran. Minung lu rengreng khualak i i chawh pi cu ttih lo awk zong cu a tha bak loh. Hi thil hi January 1,2020 ah khan khuate pakhat Jahgirabad timi khua ah a cang mi thil asi. A tu ah cun police pawl nih an tlaih cang.

Police pawl nih an tlaih lio ah hin fawi tein a nupi lu hi an chunh kho loh. Caan zeimawzat chung an buaipi hnu ah a nupi lu hi an chuh khawh . A nupi min hi Rajani ti a si i an i ngeih nak hi kum 2 chung a si ve cang. Nikum 2019 ah khan fanu pakhat an ngei nain damlonak ruang ah an fanu cu a thi.

An fanu nih a thih tak hnu hna in hin a nupi Rajani cu hringtu a nu le a pa sin ah a kir i Akhilesh Rawat nih hin a va auh than. Cuticun January 1 ni ah an nupa in bia biatak ngai in an i el i an pa thinhung celh lo ah cun a nupi cu fak taktak in a velh hnu ah nam in a lu a tan. A nupi lu a tan nak nam zong hi police pawl nih kan hmuh cang tiin an chim. An case hi fiang deuh in le cipciar deuh in an buaipi cuahmah lio a si.